Björn Daníel Sverrisson

Björn Daníel Sverrisson er nafn sem langflestir íslenskir knattspyrnuáhugamenn kannast við. Björn er nýjasta útflutningsvara Fimleikafélags Hafnarfjarðar og núverandi leikmaður Viking í Noregi. Hafir þú ratað hingað inn eru ágætislíkur á að það sé vegna forvitni þinnar á Birni og er pistli þessum ætlað að varpa ljósi á sögu þessa unga manns.

Í dag býr Björn í penthouse íbúð miðsvæðis í partýbænum Stavanger og ekur um á Audi blæjubíl. En þó að þessi þögli, dularfulli maður sé búinn að bræða flest öll hjörtu á suð-vesturhorni Noregs með sterklegum kjálkum, sannfærandi skeggrót og fimi sinni á fótboltavellinum, hefur lífið ekki verið dans á rósum alla tíð hjá þessum geðþekka hafnfirðingi.

Björn er lifandi sönnun þeirrar gömlu tuggu að aldrei skuli gefast upp þegar á móti blæs. Hann var ekki bara skakktenntur, málhaltur og lágvaxinn með gyðingakrullur á sínum uppvaxtarárum. Hann var það vel fram á fullorðinsár. Þá eru allir vinir hans efnaðir og vel þekktir einstaklingar í þjóðfélaginu. Svo að róðurinn var þungur, en kæruleysi og húmor fyrir sjálfum sér héldu honum á floti og komu honum á þann stað sem hann er á í dag. 

Í janúar 2013 byrjaði ég að vinna sem stuðningsfulltrúi í Engidalsskóla í Hafnarfirði. Í skólanum starfaði fyrir einn stuðningsfulltrúi og var hann beðinn um að setja mig inn í starfið. Ég var kynntur fyrir þessum 23 ára bílprófslausa skrollara sem bjó rétt hjá skólanum í bílskúrnum heima hjá mömmu sinni. Það sem eftir lifði vinnudagsins fór þessi ómenntaði Georg Bjarnfreðarson með mig út um allan skólann og útskýrði fyrir mér hvernig þetta gengi fyrir sig. Það tók mig ekki langan tíma að átta mig á því að hér var ekki um starfsmann síðustu mánaða að ræða þar sem dagurinn fór að mestu í að sýna mér hin og þessi salerni sem ekki voru í notkun en hann hafði lykil af. Þar kæmi hann í það minnsta þrisvar á dag og hægði sér í rólegheitum fjarri látunum og ringulreiðinni sem fylgdi nemendum skólans. Björn var einnig búinn að koma sér upp afar þægilegu vinnufyrirkomulagi og vann aldrei á mánudögum, né heldur eftir hádegi á föstudögum.

 

Ári síðar höfðu svo sannarlega orðið kaflaskil í lífi þessa unga manns. Eftir að hafa tekið sig algjörlega á í mataræði, áfengisdrykkju og kvennafari, hafði hann náð settum markmiðum. Hann var búinn að vinna öll einstaklingsverðlaun tengd knattspyrnu á Íslandi, var bestur í FH, bestur í deildinni og þá var hann einnig titlaður íþróttamaður Hafnarfjarðar við hátíðlega athöfn. Sæti í landsliðinu var svo enn ein rósin í hnappagatið hjá Birni. Eins og það væri ekki nóg, skrifaði hann líka undir atvinnumannasamning við Viking í Stavanger og losnaði við spangirnar. Það er því óþarfi að fjölyrða um það að aldeilis hafði ræst úr pilti.

En Adam var ekki lengi í paradís og Björn lét velgengni þessa stíga sér smávægilega til höfuðs. Hann nýtti hvert tækifæri til að birta myndir af sér með verðlaunagripi sína á samfélagsmiðlum, helst ber að ofan, og fór gjarnan með medalíur um hálsinn út úr húsi til að sinna hversdagslegum erindum. Hann fór að eyða miklum tíma á stefnumótaforritum fyrir snjallsíma lét eitt sinn hafa eftir sér að hann væri "uppteknari en gúrka í kvennafangelsi."

Það gerði honum því gott að komast í nýtt umhverfi. Í dag býr Björn við allskyns fríðindi atvinnuíþróttamannsins og nýtir sér þau til hins ítrasta. Til að mynda hefur hann öllu meiri frítíma á höndum sínum en áður og hefur það speglast í nýjum, áður óþekktum hliðum á honum. Hann er til dæmis að skrifa skáldsögu, lauslega byggða á eigin lífi, sem búast má við að sjá í metsöluhillum allra betri bókabúða landsins áður en langt um líður. Þá tók hann einnig upp golfiðkun, en var fljótlega bannaður frá golfvellinum í Stavanger fyrir að hrynja í það um hádegisbil á þriðjudegi í klúbbhúsinu og æpa ítrekað "SJAAAAAN" að þjónustustúlkunni.

Framtíðin er björt hjá þessum metnaðarfulla unga manni og verður spennandi að sjá hvað hann tekur sér fyrir hendur þegar fram líða stundir. 

Þessi stutti pistill hefur vonandi svalað forvitni þinni. Meðfylgjandi er mynd af Birni að skíta á sig. Athugið að átt hefur verið við myndina og er hún samsett.